Framleiðslugæði
Fjalaþykktir eru 45 mm og eru staðalhæðir bita margfeldi þar af.
Fyrirtækið framleiðir límtré í styrkleikaflokki GL30c samkvæmt ÍST/EN 14080:2013 og er í það notað vélflokkað greni frá Skandinavíu. Þeir límtrésbitar sem eru flettir úr stærri bitum, þ.e.a.s. bitar 65 mm að breidd eða minni, eru í styrkleikaflokki GL28c. Framleiðsla á límtré er CE vottuð af Norsk Treteknisk Institut. Timburgæði í límtré eru LS22 og LS15, vélflokkað greni skv. ÍST EN 14081-1:2005.
Í límtrésbita er notað MUF lím, ljóst melaminurealím sem samþykkt er fyrir límtrésburðarvirki, bæði fyrir utan- og innanhúsaðstæður og rakaflokka 1, 2, og 3 samkvæmt EN 301:2013.
Vistvænar byggingar úr límtré
Með vistferilsgreiningum (Life Cycle Assessment) hefur verið sýnt fram á að umhverfisáhrif eru minni við byggingu og rekstur húsnæðis þar sem notað er límtré í burðarvirki en samsvarandi byggingu þar sem notað er stál eða steypa. Timbrið kemur úr norrænum nytjaskógum þar sem mikil binding á koltvísýringi á sér stað.
Prófanir á íslenskum viði til límtrésframleiðslu
Í ársbyrjun 2019 undirrituðu Límtré Vírnet, Skógræktin og Nýsköpunarmiðstöð Íslands samkomulag um tilraunavinnslu á íslenskum viði til límtrésframleiðslu. Skógræktin lagði til flettan borðvið, Límtré Vírnet sá um þurrkun og límingu í límtré og Nýsköpunarmiðstöð annaðist brotprófanir á bitunum. Fjórar viðartegundir voru prófaðar, fura, ösp, greni og lerki.
Prófunum lauk síðsumars 2019 og verkefninu lauk með útgáfu skýrslu í september 2019. Hér að neðan má finna hnappa til að hlaða niður útdrætti úr rannsóknarskýrslunni sem og skýrslunni í heild.